——看見阿亮，佮伊所紀錄的台灣少年工

王 昭 華
詩人、歌者、文字工，擔任《綠的海平線》閩南語翻譯。2006年初發表個人第一張閩南語創作專輯《一》，由馬拉唱片發行。

（感謝昭華為了影片宣傳，將她所寫「 回望 綠的海平線」錄製台語文有聲板，讓更多人可以「聽見」《綠的海平線》！歡迎各位朋友可以下載「 聲音檔」和「 文字檔」，不但可以聽見昭華溫柔的聲音，還能直接感受到她撰寫這篇文章的聲調語氣，想學閩南語的朋友，一定要一邊讀「 回望 綠的海平線」，一邊聽昭華以正腔圓的閩南語唸這篇文章！

—————————————

……島嶼藏在海平線之下，將海水染成綠色的——日據時代日本來台灣的畫家的遊記，在他們有美感的眼光裡面，形容台灣是一個「光之國，綠之島」……同一條綠色的海平線，充滿神秘不可知的南國情調，以及野心帝國的南進寄望。

鄉下地方的十四五歲孩子，不過是大時代的小卒子……但是我的朋友阿亮，用四年的時間，將這群「台灣少年工」的故事變成「聽得到聲音、看得見影子」的紀錄片，回復那段歷史……

（原文刊載於 部落格 花埕照日，昭華並錄製閩南語有聲版。）

—————————————

【台語原文~下方有華語翻譯】

毋捌坐船出去外海，上ke是佇淡水的漁人碼頭坐遊艇，出淡水港，海湧一下大起來nia5，船仔就隨欲越入去淡水河口，往八里左岸、抑是老街渡船頭駛去。開闊的淡水河面，一爿大屯山、一爿觀音山，好親像兩支手骨展開開，隨時一下就欲共拄學行、行無幾步路的囝仔攬起來，毋甘伊佇外海的風湧裡sim3啊sim3——

佇淡水，好天的時，海平線是藍色的；歹天的時，海平線是茫霧的。我從來毋捌坐大船離開即塊島嶼，毋曾佇船仔尾看白湧將島嶼愈sak愈遠，sak對天邊、sak對海角，最後，歸粒山頭藏水味，化作一條綠色的海平線……

阿亮所拍的紀錄片《綠的海平線》，講的故事就是一陣坐船離開故鄉的少年，佮怹袂按算得的運命。1944年，第二次世界大戰猶咧拖棚，日本迫切需要軍用的飛翎機，所以唯殖民地台灣募集八千偌名的少年工，到日本支援飛翎機生產。當年，遐的少年工攏是十四五歲仔，拄唯公學校、或者是高等科畢業的學生，想講，有工通做、有冊通讀、有飯通食，憨膽也好、辜不而終也罷，總是一條出路。

島嶼藏佇海平線之下，將大大片（phen3）的海水染做綠色的——我想起進前所讀過的，日據時代日本來台灣的畫家的遊記，講著安怎代先看著海面上的雞籠山，漸漸進入基隆港，風景如何美麗；佇怹有美感的眼光內底，形容台灣是一個「光之國，綠之島」——仝一條綠色的海平線，充滿神秘不可知的南國情調，以及野心帝國的南進寄望。

草地所在的十四五歲囝仔，只不過是大時代的小卒仔。即段八千偌粒小卒仔共同的往事，若是出現佇台灣史的年表，應當是一cua7無幾字就寫完，考試嘛袂考的條目吧。但是我的朋友阿亮，用四年的時間，開欲百偌萬，將即陣「台灣少年工」的故事變做「有聽聲、有看影」的紀錄片，訪問四散各地的當事人，大部分攏是七十偌偌、欲偎八十的阿伯，同時嘛真幸運，無意中找著當年的宣傳影片，透過鏡頭，回望彼段歷史。

阿亮的本名叫做郭亮吟，是一個少年的女導演，朋友攏叫伊阿亮，煞無人叫伊阿吟。

舊年秋天，我的專輯擱存後製工作咧收尾，平面設計當咧進行，無上班的日子，袂輸佇厝咧待產的女人，但總嘛是愛加減活動，闌珊工罔做。朋友晏珊，是《綠的海平線》的製片，共我講伊佮朋友當咧舞一支紀錄片，需要一個翻譯台語的人。

彼當陣，阿亮人滯佇日本神奈川縣的大和市，也就是當年台灣少年工佇日本受訓練的基地，海軍空C廠附近。阮兩人開始通電子批，完全無生份的感覺。我對阿亮、佮阿亮所投入的主題非常好奇，進前拍的家族故事《走找1946年消失的日本飛翎機》、即擺選的台灣少年工的故事《綠的海平線》，阿亮好親像一個找根的人，認真，斟酌，意志單純，掘啊掘、掘啊掘，唯一叢草仔根找落去，不知不覺之間，予咱看見遮個相交接、相牽連的根，原來是湠甲遐呢開、鑽甲遐呢深。

即馬回想起來，我會記得有一擺的批裡，捌佮阿亮講著「親愁」。「親愁」兩字，是我頭殼無意中pook出來的一個詞。鄉親、鄉親，有「鄉愁」，應該嘛有一種感情，會當講是「親愁」吧——奚是非常屬於個人的感情，無像鄉愁的「鄉」有集體的記智。

舊年反應熱烈的《無米樂》，今年阿亮的《綠的海平線》，所紀錄的主角攏是1930年前後出世的台灣人。我的父母嘛屬於彼個世代，透過影片內底佮我父母仝沿的阿伯、阿姆，我的「親愁」得到回應，對怹有擱較深的了解。怹所活過的青春佮時代，有的人毋敢講、有的人毋願講、有的人頇顢講……歷史無怹的聲，後來的世代聽無怹咧講啥。無聲的過去，遺落佇敖嗆聲的現代。

阿亮講伊的台語袂輪轉，但是竟然做遮濟訪問，佮遮濟少年工阿伯交陪。我雖然掛「台語翻譯」的名，毋拘，意思並毋是阿亮咧做採訪的時，我對佇邊仔翻譯。但是即支片內底的客語佮日語訪問，就真正攏是靠古少麒小姐佮Fujita桑的現場翻譯協助，正有通完成。我是等到阿亮開始ka7片，剪一個見本出來，寫好口白稿寄予我，我翻做台語了後，讀一遍錄落來，予伊先配入去影片看昧，經過來來去去修改佮討論，最後定稿，正請林強來配音。（算是我做好DEMO，請林強來唱原版的啦！）另外，順soa3嘛替阿亮注意字幕，看是毋是有錯誤。（影片出來，擱發現幾偌位喔！……）

想袂到，十五年前佇台仔腳看林強唱「向前走」，自安呢開始寫台語歌的我，想講地球是圓的，有一工相遇會著，擱有影真正遇著——而且是佇遮呢殊勝的機緣內面。

台灣少年工的故事，有飛翎機、有戰爭，加上有林強的配音，無定著一寡朋友會以為這可能是一部ping-ping-piang2-piang3的影片，予大家又擱「綠」、又擱「台」的聯想……

《綠的海平線》並毋是安呢。

伊真「厄」——，厄聽、厄看。佇遮，我擱愛講著台語的奧妙。「厄」差不多是華語「難」的意思，但是，華語若講「難聽、難看」，直接翻台語，會變做是「歹聽、歹看」的意思。「厄聽、厄看」較接近「無容易聽、無容易看」的意思。

一部大家猶未看著的片，事先就共講「厄聽、厄看」，實在違背廣告宣傳的原則。但是我願意安呢天良講，嘛相信，安呢真確的表達並袂損害即支片的價值，反倒轉來，非常符合即支片的精神。

即字「厄」，是佮咱久長以來所慣習的感官經驗相對。

《綠的海平線》有豐富的聲音演出，講台語、講客話、講普通話的阿伯，講日語的先生，讀當年日文批信的少年……怹用家己的話語，講家己的故事，怹的時代原本的貌樣，就是安呢。阿亮將影片的節奏放真慢，就是欲予大家慢慢仔聽、慢慢仔看，聲音內底的情緒、面容仔顯出的表情，這是嚴肅的歷史，深沉的過往，毋是刻意親和會當掩蓋，毋是虛嘩渲染會當侮慢。

「厄聽」的語言，「厄看」的過去，咱的時代的少年，是毋是有甘願予「厄」、嘛堪得予「厄」的精神，願意接受無仝款的視聽經驗，去體會另外一個時代的少年、完全無仝的生命史？……

厄，但是優雅、深沉，虔誠、無失真，是我對《綠的海平線》的感言。

———–（原文刊載於 部落格 花埕照日，昭華並錄製閩南語有聲版。）